陳偉霆（William）前晚到中環為其代言的男性護膚中心宣傳，雖然在廣告內William赤裸上身大騷肌肉，不過前晚他卻由頭包到實，他笑說：「最近因為拍戲成日都冇衫着，只着底褲，所以我最近身材都keep得好好。」
攬女分四季
William最近拍攝新片《前度》將會在戲中連攬四位女角，他說：「阿Sa（蔡卓妍）係夏天好熱情，周慧敏係春天，因為係細個偶像，阿嬌（鍾欣桐）係冬天，好cool，詩雅係秋天，喺戲中我哋有場激吻戲。啲工作人員見到我着底褲仲問我有冇塞嘢入去，我係真材實料，不過現場有成廿人，所以就冇（生理）反應。」不過當提到與Angelababy翻撻的傳聞時，他卻強調大家一直是朋友，並避忌表示自己不鍾意玩地下情。
採訪、攝影：何慧斯