陳奕迅(Eason)近期受到無綫同四大唱片公司嘅版稅糾紛影響，除咗令到佢冇機會上TVB嘅節目外，就連勁歌總選都有機會食白果，雖然少咗宣傳渠道，但無損Eason嘅號召力，佢嚟緊喺3月21日至4月1日喺紅館舉行「DUO陳奕迅2010演唱會」，馮仁昭知道個唱記者會都未舉行，但佢一連12場嘅內部認購門票就已經火速爆滿，而門票就會喺本月21日公開發售。
進賬1000萬
將會喺今個月20號為個唱舉行記招嘅Eason，原本計劃只係開六場個唱，點知消息一曝光後，單單內部認購就即刻爆晒，搞到佢公司要立刻喺一星期內決定兩度加場至12場先可以應急，不過12場個唱都未必應付到市場嘅需求，所以佢哋都仲傾緊再加場，馮仁昭又同Eason計吓，以佢平均一場演唱會酬勞80萬嚟計，今次佢一炮過開12場個唱，單係酬金上就有近1000萬嘅進賬，吸金能力認真驚人。
此外，由於Eason以往開演唱會都甚少請嘉賓，所以佢家都考慮緊嘉賓問題，而同公司嘅Mr.及謝安琪亦都係考慮邀請嘉賓之列。