鍾欣桐（阿嬌）、陳偉霆（William）、詩雅、向佐、監製杜汶澤同導演麥曦茵，噚日喺慈雲山出席新片《前度》嘅開鏡儀式。電影公司老闆楊受成一到場就讚瘦到面都凹晒嘅阿嬌靚女，向佐就成隻手都係假紋身，加埋佢個cool樣，真係成個後生版龍五咁。
《前度》係阿嬌喺淫照事件之後，第一部擔正嘅戲，佢喺戲入面會同William激吻。有傳內地封殺牽涉淫照事件嘅藝人，所以部戲可能喺內地上唔到，點知阿嬌話：「都冇預到（內地上映），主要都係香港同東南亞市場。」
梁洛施充實自己
阿嬌話同William嘅激情戲最重要係靚，William咀完阿嬌再咀詩雅，仲成日都要着住條底褲四圍走。監製阿澤就話阿嬌以前都係演鄰家女孩，今次個角色就會立體啲，問佢有冇見過契女梁洛施（Isabella）？佢話：「有同佢食過一次飯，我都有同佢講叫佢唔好再做呢行，鼓勵佢多啲時間親子。」問阿澤其他細節，佢淨係話Isabella想充實吓自己喎！
