基金換馬，威力唔係嘢小，去年備受追捧的汽車股、內需股，今年一開始便風光不再，中國動向（3818）、李寧（2331）、吉利汽車（175）與海爾電器（1169）等的去年明星股，近日上升乏力，相反，去年大跌股如中交建（1800）、中通信（552）扭轉劣勢，昨日出現報復性升勢，不過呢類重磅股升得一日好快有炒家獲利沽貨，等回吐至慢慢買未遲。
另一類今年主題係通脹，食品與能源唔少得，本周農業與能源股升到你唔信，事實上油價已連升多日，油股與煤股卻是剛剛熱身，應仲會有排升。煤股當中，恒鼎實業（1393）股價往績表現最有爆發力，其股價由去年3月中的2元水平，一直升至7月近9.50元，升幅以數倍計，同期中煤能源（1898）升幅一倍都唔夠，中國神華（1088）則勉強有一倍升幅。
凱順似在熱身
雖然恒鼎累積升幅已經唔細，但係計估值仍然抵買，參考彭博數據，其預測2010年PE約17倍，與神華及中煤睇齊，不過油價係咁升，煤價大概都會同步，以上盈利預測向上調高空間頗大。
如果想買有注資概念細價能源股仔，凱順能源（8203）似在熱身當中，其股價經近幾個月回調，已經跌返去年9月急升時水平，這類概念股仔在儲貨時會悶到不得了，惟一旦發力好難追得切，現水平酌量買少少，假如能源概念成勢，這類股份遲早有得爆。凱順昨收0.88元，跌2.2%。
歐陽風