人氣o靚模周秀娜由香港發功到加拿大，上月底她遠赴多倫多做騷掘金，連環出席時裝騷及倒數活動等，踏入新一年即有六位數字酬勞袋袋平安。至近日她返港並得悉毒模周凱盈（Monique）被判感化令，直言Monique不要只靠在記者會得把聲改過，又稱「唔希望再有呢啲人同呢啲事出現」。
周秀娜（Chrissie）上月底撇甩髮型師男友，單拖殺去加拿大多倫多銀，在8日內接連出席時裝騷、簽名會、倒數活動及探訪老人院等。由於行程緊密，她只逛過酒店附近的商場，以及於約攝氏零下10度氣溫下遊覽尼加拉瓜大瀑布，雖然當時漫天飛雪凍到飛起，但她笑言因心情太high掛住影相，所以對寒冷毫無感覺。
怕簽名會冇人
留加期間，Chrissie曾出席一個宴會，並於會上穿着低胸婚紗、晚裝及米袋製造的環保露背裝行catwalk，翌日還在當地商場舉行簽名會，Chrissie昨於電話中說：「之前我仲好低能，心諗我冇喺多倫多做過簽名會，陣間有冇人嚟？結果有好多人排隊，有啲fans係情侶、夫婦，仲有12、13歲嘅細路仔，所以好surprise。」
連日工作為Chrissie帶來六位數字收入，她笑言「都可以睇吓樓」，為其買樓夢踏前一步，難怪她出席倒數活動後，與活動司儀鄭敬基等齊齊唱K輕鬆一下。提到鄭敬基是80年代歌手，現年24歲的Chrissie笑謂：「我識佢，《酒杯敲鋼琴》吖嘛，佢拍過《烈火雄心》，嗰晚唱K佢仲唱首飲歌畀我哋聽㖭。」
日前Chrissie返港，從電視上看見毒模Monique被判接受12個月感化令，問Chrissie會否覺得Monique索K損o靚模形象？
嘆毒品損形象
Chrissie直言：「經過呢件事之後，大家應該引以為鑑。我對於毒品呢樣嘢好抗拒，我睇電視見到佢開記者會，講到咁大聲，佢真係要大力改進，既然法官判咗，希望佢改過自新。我諗今次係個別事件，唔希望再有呢啲人同呢啲事出現，其他人都有努力過，希望唔好因為呢件事影響到。」撰文：葉雪