第3屆亞洲金融論壇喺今個月20至21日舉行，今次主題係「環球經濟新局面：亞洲新角色」，呢個由港府主辦嘅香港頂級金融論壇，收費唔嘢少，位位6200蚊；不過今屆為期兩日，而且主講嘉賓星光熠熠，家已有超過1200名嚟自世界各地嘅人報名，多過去年嘅1100人。
出席演講嘅粒粒皆星，包括好少喺香港露面嘅國際貨幣基金組織總裁卡恩，仲有「新末日博士」魯賓尼。內地嘅中銀監主席劉明康、中投董事長樓繼偉、上海市副市長屠光紹等亦會演說。香港嘅主講嘉賓都唔弱，有金管局總裁陳德霖同財經事務及庫務局局長陳家強，「雙陳」同場講金融危機影響，咁就不妨睇吓「攞命陳」加「儍強」會出現咩化學作用嘞！