活到老，學到老，40歲學人跳老舞。退任天文台台長大半年的林超英，從小就有鋪返學癮，投身社會後，不論外間是否風球高掛，也堅持學番一兩門手藝，渾身無肉的他，最經典的「手藝」，莫過於跳現代舞，結果一跳即出事，再跳便抽筋，「試過唔夠warmup，成個人『卡』一聲，跳過先知咁難。」
林超英說，早在80年代已經有興趣學跳芭蕾舞，求教名師王仁曼，結果「一條麻甩」擔心影響其他同學而作罷。
與o靚妹學法文
興建新機場時，他忙於設計預測風切變的系統，不忘向難度挑戰，放工趕頭趕命學法文，原因不是識女仔，「40幾歲學語言，應該好難，應該冇乜可能啩，就係難先搵呢樣嚟學，隔籬嗰啲，全部都係10幾歲DGS（女拔萃）嗰啲o靚妹仔。」
此後五年，長老級學生林超英的法語大有進步，於是他轉投西班牙文懷抱，時任天文台台長，「因為French學過，覺得唔夠難，返工好忙，唔想成日掛住天文台啲嘢，於是又想搵啲嘢讀，雖然我個樣好似好瀟灑，但其實成日都記住啲工作，有啲人覺得我混混吉吉，其實我都認真做嘢o架。」
學海無涯，今日周身刀的林超英，也有經過無知的年紀，他自爆當年考入英皇書院後的經歷，「嗰陣英文好屎，讀中文小學，入學嗰陣成班喺體育場度等，副校長嗌名，經過條旋轉樓梯行上去，人人都走晒上去喇，點解你仲喺度嘅？咁我點知我個名叫LamChiuYing啫，我淨係知自己叫林超英之嘛。」
就是這種對無知的自覺，促使他多年來不停學習，至愛幫襯SPACE的前身──港大校外課程部，30多年下來讀過10多個課程，由觀鳥、現代舞、國畫、西洋畫、社交舞、土風舞、西班牙文到術數，今年獲香港大學專業進修學院校友會頒發傑出校友獎。
記者 張嘉雯