連日來坊間輿論一面倒唱好大市，股評人的心水選擇大多熟口熟面，不是新能源便是內需、食品或半新股，短炒無妨，但要了解全年動態，只得幾個股票「冧巴」唔係辦法。
從目前掌握的數據可輕易得出今年市場重點，乜嘢新能源、家電汽車電腦下鄉甚至農業股，全部細眉細眼睇怕都係見光死。其實今年宏觀大主題只得一個，就係全球性通脹。
去年12月，越南消費價格指數升6.5%；印度食品批發價升至近11年新高，同比升近兩成，迫使央行考慮加息；中國採購經理指數高企56.6，針對原材料庫存嘅數字更係05年有紀錄以來最高，反映企業買料生產步伐加快，即係存貨賣得快咗。
今年市場焦點走唔甩
表面睇確有復蘇勢頭，可惜PMI數據反映唔到貨品價格到底貴咗幾多。就以印度為例，當地12月PMI連續9個月高於50水平，而新接單指數勁彈到60.1，冠絕全球。風光背後，由於去年氣候反常令農作物失收，喺食品價格帶動下，印度食品批發價格指數近幾周漲幅徘徊兩成高位。全球三大大米出口國當中，印度同越南已經算係出咗事，好彩泰國仲保持不多於4%通脹，但久守必失，美國大印銀紙，被動嘅亞洲國家點會唔當殃。
若有留意近日滙價走勢，美元反彈浪未完，股市樓市竟然繼續有得升，主張美元同股市背道而馳簡單線性關係嘅朋友，要小心行事否則隨時被挾死。美元反彈，商品價格又彈，若趨勢持續，「苦過弟弟」嘅將會係除咗美國同埋香港以外嘅所有人，因為一來美金貴咗，石油加埋價，銅鐵、鋁材同金全線升，見到都心寒，通脹點會唔惡化。
不過，香港夾喺同美金掛鈎及中國十幾億人口的經濟體系中間，貨幣政策跟美國，但經濟增長動力卻源自中國。美國要壓通脹極可能加息，但中國負擔唔到只能繼續價格管制，結果引伸更大的系統問題。香港夾喺中間，兩邊不是人，打工仔人工冇得加，但食品租金就越嚟越貴，難怪同基金老手傾開都話，雷曼事件後邊個都信唔過，惟有將老本買樓保值，外邊世界係點都顧唔得咁多。
胡孟青