民協馮檢基搞社企有板有眼，家仲揚威海外。基哥同八方講，近日台灣「壇香山」咖啡品牌其中一名話事人榮哥主動接觸民協傾合作，雙方一拍即合，最快2月農曆新年後就會開第一間舖，應該先喺工貿區落腳。基哥指台灣過江龍對喺香港拓展市場好有信心，如果站穩陣腳，兩年後應該可以開分店。榮升咖啡店老闆，基哥卻唔飲咖啡嘅，為惡補咖啡知識，早前一次過連隊八杯不同種類咖啡，基哥話連飲八杯咖啡嘅感覺係好興奮，仲覺得有醉意，唔停口講嘢，甚至連關節都鬆咗。八方聽到覺得好神奇，基哥咁high，唔係飲咗第樣嘢啩。