陳七龍咁威！世界波射爆熱刺、去英國跟操、坐頭等機返港踢東亞運嘅金牌功臣，未計佢喺娛樂版見報嘅新聞，陳七陳肇麒今個球季真係紅到發紫，就連《警訊》都要搵佢同門神葉鴻輝一齊做嘉賓主持，噚日仲同李靜等成班東亞運獎牌運動員喺銅鑼灣鬧市，向市民講解「防罪小貼士」，當然成為眾人焦點啦。
「做戲好難o架」
雖然葉鴻輝噚日就冇同陳七等8名東亞運獎牌運動員一齊現身銅鑼灣，但聽陳七講番，原來佢哋較早時間已經做咗錄影，但就唔係好似鄭中基喺電影《龍咁威2003》裹面嘅「警信」咁又去曲街，又扮空姐咁激，亦唔係喺案件重演嗰part扮好人或者壞人，只係同阿輝喺球場度傾吓計，「交足戲」咁講解吓啲網上罪案。
未試過做戲嘅陳七仲話自己做戲天份不如踢波，佢笑住咁話︰「做戲好難o架，搞到要勁NG，佢哋叫我扮個疑惑樣喎，我諗咗好耐都唔知點做；又要背台詞，但未試過（做戲），真係要學吓。」
網友「惡搞」變熱刺兵
不過，睇番噚日陳七夥拍歐陽耀冲喺銅鑼灣同市民玩完遊戲後，再喺現場拍多個同觀眾拜年嘅鏡頭嗰陣，佢哋都係NG咗一次啫。曾經喺小學時期做過少年警訊嘅陳七，曾講過志願係做消防員，但冇諗過大個咗會做咗個咁傳奇嘅職業足球員；近日仲有網民將佢加入埋經典足球電玩《WinningEleven》入面，「正式」成為熱刺嘅一分子。
至於陳七可唔可以進軍英超就未知，但佢同阿輝喺《警訊》嘅精采演出，就將會喺後日（8日）起，一連4個禮拜五喺二奶台晚上7時播出。反應好的話，唔知谷導演會唔會搵埋佢哋客串吓《龍咁威》第3集呢？
