高鐵669億元撥款聽日表決，「80後」五區苦行幾十個鐘頭，希望議員手下留情保住菜園村，佢哋咁辛苦，真係聞者心酸，見者動容；一眾保皇派議員都叫苦連天，皆因聽日個財委會馬拉松式會議可能開足六個鐘，雖然佢哋只係坐以待「幣」舉手機器，但點都「股」唔到會咁辛苦。
40後骨硬唔坐得耐
飲食界議員張宇人噚日話自己係「40後」，筋骨僵硬唔坐得耐，要佢連續坐六個鐘頭係另類苦行，所以要不時起身舒展筋骨，「最多都係由前廳坐到後廳，由後廳坐上飯廳，再由飯廳又坐落番前廳。」八方建議張宇人學吓歌手衞蘭咁做瑜伽，減輕臀部痠痛好有效o架。
泛民擅長拉布，張宇人話已準備長期作戰，聲言身為飲食界議員，絕對唔會容許開會當日無飯開，仲可以幫記者落埋柯打，四餸一湯、九大簋甚至消夜都有得食。
民建聯葉國謙想速戰速決，認為專業人士交書面意見就得，聽日唔使親自到場發表意見；自由黨副主席方剛卻打定輸數，講笑咁講問記者使唔使準備帆布床喺立法會守夜。官府通過撥款事在必行，為咗「股」勵保皇派議員坐定定㩒掣，八方相信政府提供高床軟枕畀議員休息都冇所謂。呢筆撥款成600幾億元，30幾個保皇派議員平均每人「坐擁」20幾億元，絕對係超級尊貴豪華臀，政府唔會待薄佢哋嘅。
80後煮魚蛋籲思源
財委會主席劉慧卿將心比己，無謂搞到會議多「臀」糟，噚日話每兩個鐘頭有15分鐘小休。議員聽日臀結一致表決撥款，反高鐵人士就號召萬人Big爆立法會去中環集會，菜園村民會即場煮客家鹹湯圓，80後就整民主魚蛋，寓意議員應該飲水思源，唔好一味食蛇宴。港大民意網站點數指元旦遊行有1萬至1.2萬人參加，唔知聽日能否打破紀錄？