啱啱送走2009年,仲有5個禮拜,又要過舊曆新年,送牛迎虎,中國人年廿八,傳統係洗邋遢嘅日子,接近收爐,估唔到今年對華華嚟講,有多一樣嘢做,就係要留意首隻藍籌股公佈09年度業績。邊家公司先拔頭籌?之唔係寶哥哥間寶號東亞銀行(023)囉。
噚日東亞喺金鐘一間酒店搞咗個研討會,李家兩仔爺,主席兼行政總裁李國寶同佢乖仔、東亞副行政總裁李民橋齊齊現身,不過父子同心,兩人不約而同對傳媒提問封嘴,皆因過年前就公佈業績,家吓係緘默期咁話。
講開23號仔東亞,過去一年,喺大馬富商國浩集團(053)郭令燦家族收購憧憬下,股價被不斷舞高,直至舊年除夕,寶哥哥使出一石二鳥政策,批股畀第一大股東西班牙Criteria金融集團,變相拋離國浩嘅持股量,又同時抽水集資,鞏固東亞資本實力,令寶哥哥暫時可鬆一口氣。