阿根廷中場華朗日前爆響口，話曼城同所屬球會學生隊出價700萬鎊（約8,600萬港元）羅致佢，仲願意畀相同數目嘅人工佢，不過佢以喺阿根廷過得好開心為理由，婉拒咗曼城嘅好意。華朗雖則喺學生隊表現好好，以及同曼城領隊文仙尼係老死，但畢竟都成34歲，而且之前效力曼聯同車路士都係失敗收場，但曼城仲夠膽死用1,400萬鎊嚟羅致佢，認真係洗腳唔抹腳。曼城亂咁使錢，唔怪得截至09年5月31日嘅財政年度蝕成9,260萬鎊，但好彩佢哋老細蒙蘇超有米，佢家族嘅身家有成5,600億鎊；聽講蒙蘇喺08年上場後，幫曼城解決咗3億零500萬鎊嘅債務，真係令一眾負債纍纍嘅球會妒忌死。