阿彌陀佛，一代魚王魂歸天國，屍骨未寒就要離鄉別井，仲要俾人「抽水」。由板前壽司投得嘅藍鰭吞拿魚王「日本一」同佢嘅同伴，今日會去到無綫電視城參與新劇《魚躍在冬季》拜神儀式。無綫梗係唔係超渡魚王做法事啦，而係擺佢哋上枱，為新劇贈興咋。
無綫抽水絕不是但，據講呢套新劇其中一個橋段，係講一個香港人走咗去日本投到條藍鰭吞拿魚王，所以今次就搵條魚嚟做騷。不過八方提醒無綫小心抽水抽着火水，皆因環保團體批評食肆將藍鰭拿魚當宣傳工具係鼓吹濫殺瀕危動物，無綫隨時再成為箭靶。
舊年亞視節目《豪遊天下》預告片介紹食鯨魚肉，主持人黃麗梅食得津津有味，大叫「好多油、好食！」結果惹起環保觸覺、香港海豚保育學會、世界自然基金會等群起炮轟，譴責亞視鼓吹食鯨魚，亞視終於罕有地喺節目抽起食鯨肉片段。據稱志雲大師食長齋，點解對拿魚又無惻隱之心呢？