大型新股俄羅斯鋁業（486）將會喺本月27日在港上市，不過監管機構驚住俄鋁風險高，怕散戶中伏，所以好罕有咁大幅提高最低入場費至100萬港銀，真係少啲財力都唔得，散戶認購俄鋁亦有難度。不過，呢間公司嘅古仔就唔少，好似《華爾街日報》噚日有篇文，話促成俄鋁來港上市嘅「紅娘」，就係現任俄羅斯總理普京。
原來普京同俄鋁大股東兼行政總裁德里帕斯卡（OlegDeripaska）關係良好，雙方有生意來往，而凡係克里姆林宮嘅大project，呢位行政總裁都會鼎力支持，當中包括2014年索契冬季奧運。
CEO訪華爾街靠普京
眼見總裁出錢又出力，普京亦以禮回饋，曾經有一段時間，美國同加拿大政府以種種理由，拒絕向德里帕斯卡總裁發出入境簽證（根據俄鋁初步招股書披露，德里帕斯卡否認任何罪行，以及從未被判有罪），但舊年9、10月間，喺普京穿針引線下，佢終於可以到訪華爾街，同投資銀行商討上市大計，跟手仲陪埋普京到訪中國，希望為俄鋁上市搵到好投資者。
唔單止咁，以普京做主席嘅俄羅斯對外經濟銀行VEB，不但批出45億美金貸款畀德里帕斯卡，而且仲豪擲7億美金，認購俄鋁約3%股份。
除咗同俄羅斯政壇關係良好，德里帕斯卡對香港情況都幾熟吓，識得搵香港前律政司司長梁愛詩，做俄鋁獨立非執董，唔知呢次又係咪由普京幫手？
李華華
mailto:[email protected]