李慧琼噚日喺立法會動議辯論「建立全面保障消費者制度」，自爆落力幫苦主，皆因曾經俾人呃。阿琼透露，大約10年前做女嗰陣，行街時有模特兒公司職員兜搭佢，大讚佢外形、身高十分適合做model，當時年少，自然無知，以為自己真係好索，咁就落叠啦。
之後情節，唔使多講，梗係要畀錢參加訓練班、學化妝、學行catwalk等等啦，大家耳熟能詳，八方不贅；阿琼俾人呃完佢有姿色，再俾人騙財，o靚模夢碎，冇咗萬幾兩萬蚊，都唔敢話畀阿媽知，啞忍多年，唔忍心再有無知少男、少女步佢後塵，終於自爆呢段事，要求政府加強打擊無良模特兒公司。