近日上深圳逛書局，有否留意人流已重新導向財經書籍，當中較多人留意唔再係如何貼股、看圖測市，取而代之是各大巨企如騰訊控股（700）及阿里巴巴（1688），如何由寂寂無聞變成明日之星的成功故事。
內地市場日趨成熟，同香港「冧把文化」唔同，內地幾大財經網站着眼點在於獨家消息發放，鼓勵投資者自己動腦筋、做功課。最近有媒體總結各大券商今年心水股，姑勿論眼光是否獨到，參考價值在於洞悉內地散戶投資取向，等大家喺H股呢邊早作部署。先睇內地券商龍頭點睇大市，中信證券認為上半年走勢向好，公司淨利潤增速25%，上證綜指目標4500；申銀萬國預期第一季見頂，但下半年調整後再上。
借鑑內地券商推介
點解睇內地券商緊要過外資行，因為內地股市主要係「塘水滾塘魚」，莊家喺「維持」市場秩序上極為重要，而內地券商會較市場掌握更多資訊。綜合各家大成，得出十大推介熱門股︰中信證券、西山煤電、中國平安、五糧液、招商銀行、特變電工、保利地產、鞍鋼、中興通訊、煙台萬華。反映市場傾向看好呢10隻股嘅相關板塊。
炒股指期貨，券商股我哋有對應嘅光大控股（165）；三大內銀股唔係焦點，招商銀行（3968）、平安保險（2318）同樣有H股；鞍鋼股份（347）亦有H股炒。炒五糧液除咗因為佢係A股中嘅超級莊家股，亦表示內需會繼續話事，銀基集團（886）有經銷權，股價走勢同五糧液波幅不遑多讓。
內房股大多有類似央企背景選擇，煤礦股亦唔少，全部開晒車。嫌中興通訊（763）派息少，有不時派特別息送紅股嘅京信通信（2342）同上游嘅摩比發展（947）；特變電工對應有中核國際（2302）或銀建國際（171）。最後係製造聚安脂主要原料嘅煙台萬華，雪櫃熱水器家電汽車家具航天唔少得佢，各下鄉國策股鑊氣十足，擺明要焗你上車。
胡孟青