香港學者或者係評論員，要係內地傳媒搵個地盤寫文一啲唔易，更唔好講政治文章，因為難免要提到民主、普選呢類議題，不過中大政治與行政學系高級導師蔡子強在內地《南方人物周刊》寫政治專欄，一寫就寫咗兩年，最近更加擊敗內地作家如韓寒、方舟子等，獲騰訊網嘅第二屆「影響中國年度華語傳媒盛典」，評做「年度專欄」。
呢個獎係由內地廿幾間傳媒機構提名同評選，在內地有一定份量，蔡子強同八方講，當日係《南方人物周刊》主動搵佢寫政治分析專欄，佢又覺得內地年輕人閱讀風氣比香港強，咪諗住借呢個機會向內地年輕人介紹政治文化，未諗過有機會得獎，今次結果連佢自己都好意外。