一月一日，大記者，大編輯等本來話去馬場散吓心，跟左丁山玩吓賽馬競猜遊戲，點解話係競猜呢？頭場蘇保羅馬房嘅「好心星」大熱取勝，仲有第十場嘅「納帕二號」係大熱門，兩場贏埋都唔夠一碟，中貿林老謀深算，就猜到第六場另一隻蘇廐馬「飛躍之旅」有一定實力，可以成為蘇廐變倍器，一注獨贏買「飛躍之旅」，仲要係大大大注㖭。左丁山睇馬匹狀態認為蔡明紹隻大熱門「喜綵」可勝，點知兩隻馬影相居然係「喜綵」輸咗一條鬚，左丁山頹然坐低，中貿林就搵個袋去收銀紙，罐王L曾經替中貿林算過紫微斗數，話佢嘅財帛宮有貪狼星，主有橫財命，冇得好講。後來行政會議成員葉維義隻「納帕二號」順利勝出，蘇保羅馬房真係大豐收，葉維義極少在馬場出現嘅，佢爸爸葉謀遵就必定在場，梗係由葉爸爸騎騎笑咁代拉頭馬影相啦。
大記者、大編輯等極都未進場，唔使諗都係臨時改變心意，去咗元旦遊行嘞。果然，晚上問佢哋遊行情況如何，佢哋話情況熱鬧，佢哋嘅退休老師、校長亦在場，主要係爭取雙普選與聲援劉曉波，但後來去到中聯辦附近，大記者用手機影到一幅標語──「正準備暴動流血」，就驚咗一驚，立即鬆人，因為佢冇心理準備要參加暴動流血也。
大編輯話好多年青人（八十後）參加遊行，睇落去似乎全部係社民連之友，態度比較激烈，與以前長毛等人嘅「衝擊」、「抬棺材」、「燒信」等等指定動作，全部事先有劇本，與警察有默契嘅情況唔同，故此警察面對呢班「新人類」，有啲不知所措，想搵「阿頭」傾數，都唔知搵邊個，以後再有遊行，譬如七一，恐有不可預測之事發生。
左丁山就在馬場見到消息人士，佢人在馬場，手機傳來短訊，唔係臨場貼士，而係西環街頭情況。消息人士話佢聽到特區政府高層深以一群突然冒起嘅「八十後青年」為憂，已經開會傾過研究對策。消息人士話一九六六、六七年暴動後，港英在卜公碼頭搞許冠傑音樂會及其他年青人活動，之後有青年政策，但幾十年來，無論港英還是特區，青年工作都倚賴王䓪鳴主政嘅青年協會或者蔡元雲醫生嘅青年工作，現在事實證明，王䓪鳴與青協嘅作用成疑，佢哋應該是否繼續得到大量資助，還是分番啲資源出嚟畀其他機構做青年工作，有檢討必要。