美股急升，港股梗係跟，況且美元滙價轉弱，香港資產吸引力重燃，大市成交急增至829億元，恒指高收22279，升456點。照目前市況判斷，今年1月股市有排升，如無突然利淡消息，料這一波升浪可延至農曆新年前，即係炒到2月中旬。
港股昨日升勢全面，非獨大價股專美，細價股一樣好好炒，呢種大時代格局，未大炒而又走勢異動的股份，不妨望多兩眼。田生集團（8136）係去年創業板中升幅最勁股份，08年底收市價0.06元，09年大除夕收報0.465元，全年升幅達675%；若以最高價0.75元計，升幅更達1150%。
香港土地資源有限，市中心區根本冇地，要謀求再發展，惟有向舊樓埋手，呢種客觀環境造就田生，集團收購舊樓業務可謂「出晒位」，過去三年已完成26個地盤買賣，涉資達50億元。
田生自去年11月升過上0.75元高位後，最低回至0.435元，近期由低位回升，有見底迹象。昨見異動，升5.3%，收0.50元，料是新升浪前奏。現價可買，先睇0.65元，若突破，可挑戰0.75元高位，跌穿0.43元止蝕。
方星俠