《MAG》賣點係人多勢眾！係首隻支援256人線上對戰嘅高清遊戲；二百幾人、同一個戰場同一個夢想，成盤散沙就梗係唔掂，所以戰術運用好講究。咁究竟邊個下達指令呢？班長樓上有排長，排長上司就係連長，為官階向上爬真現實，嚟！你哋同我出去行先死先！我負責補多個HeadShot收「披士」！
文：阿洛
三個字頭認清敵友
《MAG》係由曾經開發《SOCOM》系列嘅ZipperInteractive開發、SCEA發行嘅大堆頭對戰Game。故事係未來2025年，講起就眼濕濕，嗰陣全球危機逐漸成形，食物唔夠動亂處處，再加上通貨膨脹、能源危機、石油限制產量，好灰！咁嘅時世，各國政府都專注投資於人道主義、海外安全同情報活動，助長許多小型私人軍事公司（PMC）崛起，當中就有三支私人軍隊Valor、Raven同S.V.E.R.積極招募新兵，自然形成一場影子戰爭。簡單啲講，即係打餐飽都唔知為乜。
空降炮擊樣樣齊
最大特色係256人連線對戰，128對128，人多手腳亂就梗係要有明確階級制度同指揮系統，首先係8個玩家組成1個班，跟着就4個班組成1個排，最後係4個排組成1個大隊，咁就成形喇。階級觀念好重，上司就有下達命令嘅特權，除空襲召喚、迫擊炮擊外，仲可以吩咐下屬進行降落傘行動嚟個突襲。
聽聽話話有着數
你又無人工出畀我，卒仔為乜要聽高官講先？我匿埋做Sniper或者衝出去做Rambo唔得咩？得！但係玩家如果跟上司命令行動，就可以獲得額外經驗值，而且因為遊戲以團隊為主題，雖然做Rambo唔使罰，但就唔可以享用聽聽話話帶嚟嘅特別效果，例如裝彈速度快啲，跑得快啲或者射得準啲。所以都係面對現實啦，君子能屈能伸嘛！
網友玩後感：考驗耐性
你約三五知己去唱K都要等啦，何況二百幾人開拖？好多網民玩過試玩版之後，都話隻Game最大鑊係等齊人，打一場要等十幾分鐘。嗱，EQ低咯！你打二百幾個電話約人都唔止十幾分鐘啦！
Profile
遊戲：《MAG》
機種：PS3
製作廠商：ZipperInteractive
類型：動作
人數：1-256人
