班「80後」元旦大遊行後移開鐵馬，只係想過條馬路到中聯辦示威，結果俾成千個差佬攔截，連中聯辦後門階磚都掂唔到，但政府、左派已鬼殺咁嘈，指80後太激進，愛港愛國嘅民建聯80後張思晉立即抽水，整出個「我都係80後，但我唔鍾意激進！」facebook群組。
中共文革虐待知青
民記搞對抗，話咁快就有人開設「不論係唔係80後，但我討厭畀民建聯同埋政府話80後激進」群組還以顏色，指如果「80後」言行激進，咁年前來港示威班韓農咪係恐怖分子？有網民話歷史上激進分子仲多，五四運動學生遊行時聲言要打章宗祥，火燒趙家樓，毀日貨，激唔激？中共土改時殺地主，文革時虐待知識分子，請問同香港「80後」比較，邊啲人激進啲？
雖然張思晉係民記黨員，但有唔少人表揚佢設呢個群組令「革命事業又多一個根據地」，事緣唔少被標籤為激進嘅代表人物，好似周諾恒、針對TVB陳志雲嘅「鹵味男」等都有加入。周諾恒留言話好唔同意少部份青年激進思想，「他們被紅色法西斯洗腦，助紂為虐，歌頌打壓自由侵犯人權的行為，絕對是和平理性的香港人不能容忍的。」鹵味男邀請張思晉公開辯論激進問題，例如應否立即釋放劉曉波。
有「80後」感嘆余生也晚，如果有機會處身文攻武鬥的1967年，一定好玩好多，「當時左派免費教授點整炸彈，得閒又可以出街『挑逗』一吓班白皮豬、黃皮狗香港警察，分分鐘家仲攞埋大紫荊勳章、做埋局長。」
67年林彬慘被燒死
當年商業電台播音員林彬慘被燒死，唔止激進，直頭係暴動啦。唔講陳年歷史，講返近啲，回歸前鄭家富、劉慧卿反對臨立會、反對小圈子選舉特首，一齊瞓街，有人燒車胎歷歷在目，指摘「80後」激進！？八方恐怕卿姐會話真係離晒譜呀！
民建聯80後創立呢個群組，變成打着紅旗反紅旗，有80後聲明加入旨在批評民建聯同張思晉，「請別看成民建聯張思晉成功爭取青年人支持」。
mailto:[email protected]