好多人深信風水可以轉運，而英格蘭板球名宿保葛（GeoffBoycott）認為，奧雲想谷底反彈，就非借助風水不可；不過奧雲信還信，千祈咪好似個女模咁，因為太迷信而搞到俾個茅山師傅呃，就算奧雲冇色俾人騙，騙財都死啦。
板球名宿有介紹
風水幫人趨吉避凶，保葛之前生癌，佢話借助風水呢種中國傳統智慧，成功令病情好轉，所以佢認為，奧雲想入選英格蘭參加今夏世盃，就要用風水轉運：「對風水冇認識嘅人會話呢樣嘢係垃圾，不過我只可以話對我好有用。奧雲好想去南非打世盃，但佢最大問題係入唔到波，我早排寫信畀佢，同佢講風水可以幫到佢，不過佢仲未覆我。」
奧雲自從05年夏天由皇馬回流紐卡素後，就黑到家，仲多次重創長唞；去夏佢減薪加盟曼聯，但事業都係冇起色，長坐冷板。保葛繼續話：「我唔係要奧雲一定信，只係覺得可以幫到佢；若然佢有興趣，我可以介紹風水師傅畀佢。」
奧雲屬羊有福星
我求大俠唔係導人迷信，但係如果用正途，同埋冇傷害自己及人哋嘅方法去改善運程，完全冇問題。英國《太陽報》就贈咗奧雲幾招（見附表），等佢可以轉運；據我求大俠所知，喺79年12月14號出世嘅奧雲屬羊，據啲運程書講屬羊嘅人喺嚟緊嘅虎年運程唔錯，會有福星高照諸事皆順，但健康會容易出問題，所以奧雲喺比賽時要小心啲。
若然奧雲諗住求助於風水，我求大俠奉勸佢打醒十二分精神。事關世上唔少人呃神騙鬼，好似登上各大報章嗰位訛稱師公上身嘅茅山師傅咁，如果奧雲因為咁而做咗頭條新聞人物，咁就瘀爆。話時話，英格蘭領隊卡比路個左邊菠蘿蓋有事，要做手術成個換；手術後6個星期都要用柺杖，頭尾要3個月先可以完全好番。無端端要捱刀，睇怕佢真係睇風水轉運至得。
奧雲催運6招
1〉紅色旺佢，揸多啲紅色車同着多啲紅色衫
2〉床頭向南
3〉將間屋整得光猛啲
4〉虎、馬、狗都旺佢，喺間屋掛呢啲動物嘅畫或放呢啲動物擺設
5〉食多啲辣嘢，例如咖喱
6〉效力南部球會