阿仙奴領隊雲格，一直強調唔會隨便買人，同埋今日嘅兵工廠係為明日而建，而佢講得出亦做得到，自上年5月起，就不斷同球隊嘅主力好似尹佩斯、賓特拿及戴亞比等續約，夾夾埋埋已有15名球員續咗。不過，我求大俠對於佢最新續約嘅球員就有啲保留。嗰位球員係邊個？就係病壞路斯基！
路斯基自06年5月由多蒙特過檔以嚟，傷病多過上陣，同兵工廠披甲76次僅入14球，表現唔算合格；而路斯基都29歲啦，唔通雲格仲覺得佢有進步空間？如果雲格連路斯基都續約（簽至下季），我求大俠就建議佢同後衞加拿斯續埋約，佢都係32歲咋嘛，喺球隊表現仲有目共睹㖭！