「中國巨龍」姚明（右）將榮升做爸爸，外界最關心嘅，梗係「小姚明」係男定女；網民仲紛紛幫「小姚明」改名，最具「霸氣」嘅係「姚鯊」，匹配姚明做咗上海大鯊魚老闆；不過改做「姚博」可能仲好，而最新消息話姚明與葉莉（左）嘅BB預計會喺7月出世，而上海嗰時會咁啱舉行緊世博會，「博」字仲可有知識廣博嘅意思，絕對係perfect！
葉莉而家喺上海養胎，姚明當然要做「阿四」啦！葉莉嘅前上海女籃教練叢學娣話，葉莉已經改咗夜瞓嘅「惡習」，未到晚上10點就會瞓，仲睇好多育嬰書；雖有傳BB係女仔，之不過姚明想BB係男仔，話將來可以「子承父業」打籃球咁話，但生女都可以打籃球o架，又可以做明星，都唔錯！