昨晚一場春節前極少出現雷暴雨，世界變，未打春雷已見雷；今天換回藍天白雲然後清涼的陰暗，猶似英國天鬼婆面，最宜騎單車遠足。單車飛快朝米埔綠色水色天地抱擁，好友來電：「睇咗星期日《蘋果》未？你老友洪水橋『大發』上咗頭版……。」
嚇了一跳，不是人客腸胃炎或老鼠吧，暗暗為威仔與明師傅拭汗……。
好彩，原來係曾特首搵食行程曝光，突然取消訂枱。
真好彩，特首中止幫襯行程換來《蘋果》頭版。一個唔好彩，阿曾幫咗襯，大不了換來報章幾句報導或者幾張公關相睇門口，聊勝於無！
香港人都好好彩；看我們這個社會，簡直天下太平，特首唔搵食已然頭版，一個唔該特首偷食，嘩！不知上什麼版才得收科。
本來米埔之後繼續踩向新田，上水，到「廣成」吃超正蛋治與紅豆冰；既然知道「大發」今天喜事，屈尾十回去元朗直踩洪水橋八八卦卦睇睇威仔一家如何應對今日生意盛況。未到埗，遠遠見人潮湧湧千頭攢動，今日入座要攞籌？
中環老街坊「九記」及「勝香園」不用攞籌，不過要排長龍。元朗大馬路近雞地（即是Yoho山……不是YohoTown，城規會罔顧市民反對，恁令Yoho圍城火爆膨脹兼向高空發展，從米埔遠遠望去，不是Town，是山！）「田中」日本菜館萬人空巷，排隊領籌兼只得四十五分鐘進食。恭喜「大發」特首失約換來升呢派籌江湖地位。明師傅的奶茶香滑依然，廚房佳師傅的小菜碟頭飯麪繼續精采，本為特首設計了風沙九肚魚，另加涼瓜揚州炒飯，如今，惠益街坊，跟老闆說，這炒飯就叫「特首苦瓜炒飯」。