中大校長劉遵義同會計師麥嘉軒好事近，八方收到料，兩人已排期結婚，噚日喺金鐘道政府合署嘅婚姻登記事務及紀錄辦事處，見到兩人已遞交擬結婚通知書，相信好快就拉埋天窗。
通知書上月底公開，根據規矩，15日內冇人提出反對，兩人就可以註冊，由於擬結婚通知書有效期三個月，新人如果唔喺遞表後三個月內結婚，就要重新辦手續，照咁計，劉校長應該會喺今年3月底前迎娶麥嘉軒。好多中大學生、舊生反對劉遵義，但怕且唔會有人反對佢呢頭親事啩。
劉遵義今年6月退休，即係話新任校長夫人有機會入住中大校長府漢園。上月底聖誕節前，麥嘉軒有份出席八大校長喺漢園舉行嘅聚會，如果劉遵義離任前再舉行家宴，麥嘉軒就可以名正言順以女主人家身份招呼賓客。