容祖兒和謝安琪（Kay）日前在商台頒獎禮各有所獲，但祖兒僅得女歌手金獎，反而銀獎的Kay卻兼得歌曲獎，網友即炮轟賽果不公。前晚Kay和過百fans坐小輪為新碟祝捷，Kay聲言各人得獎皆實至名歸，至於祖兒則安撫fans毋須過份激動。
新聞女王謝安琪推出新碟《Slowness》不久，銷量已達金唱片（15,000張），唱片公司環球前晚包了一艘天星小輪，讓Kay和過百fans遊船河慶祝，祝賀Kay新碟成績及在新城和商台頒獎禮有好成績。至於為何揀遊船河，Kay說：「我有諗過好多慶祝方法，覺得坐小輪最有特色，可以表達到自己過去一年經歷巨風巨浪，好彩有fans同舟共濟，09年真係好波動，但好彩冇被打沉。」
否認獲得偏幫
不過日前舉行的商台頒獎禮，有歌迷投訴因為環球揸弗人黃劍濤及商台高層甘菁菁是夫婦，故此商台擺明偏幫環球，Kay表示歌手得獎代表他們付出的努力，是外界對歌手的肯定，她不會理會其他歌手得幾多獎，只覺得各人如陳奕迅及Mr.得獎皆實至名歸。至於兩高層夫婦關係引來質疑，Kay說：「我覺得冇關係，唔識評論唔識答，對於某啲抨擊唔使太過介懷。」黃劍濤被問到傳夫婦關係造就旗下歌手得獎，他說：「呢啲批評都足足講咗6年，歌手冇實力係爭唔到獎。」
祖兒嫌Fans過激
至於祖兒昨日就到商台接受訪問，對於賽果被指不公，她笑說：「算啦，我自己覺得已經係pasttense，今年fans係激烈啲，可能太投入，所以乜嘢都諗得到出嚟，我覺得連續三年攞到女歌手金獎已經好好。其實06年已經試過冇歌曲獎，所以唔係一件新事，我好滿意當晚嘅賽果。」
此外，上周五無綫播出《叱咤樂壇流行榜頒獎典禮》有19點收視（約121萬人次收看），不過截至昨日為止，無綫收到共20個投訴，指無綫未有播放四大唱片公司旗下歌手的表演片段，播放頒獎禮欠缺完整性，而無綫外事部發言人曾醒明則表示TVB跟4大唱片公司的版稅問題還未解決，已預告部份表演片段不會出街。至於廣管局則收到53宗投訴指無綫播商台頒獎禮不夠完整，另外20宗則指賽果不公平。
採訪：張俊銘、何慧斯
攝影：黃文成