狀態大勇嘅葉劉淑儀噚日將原本設喺西灣河嘅匯賢智庫社區服務中心遷入民建聯蔡菜子根據地北角。佢話舊舖租約期滿兼漏水，唔走唔得；選擇落腳福建票倉北角，葉劉話兩次選舉後發覺呢區居民對佢好熱情，係時候為福建鄉里做多啲嘢。
兩位福建幫大佬包括福建社團聯會永遠名譽會長盧文端同現任主席林樹哲，噚日親臨主持揭幕禮，證明葉劉深得福建幫歡心，葉劉仲用流利福建話講多謝。
中華廠商聯合會副會長施榮懷都係福建人，又係港島區選民，八方唔知佢係咪葉劉fans，但肯定佢係工展會捧場客，成個聖誕假期貢獻咗畀工展會。今屆工展小姐選舉爆出裸照風波，施榮懷直認睇過雜誌所載嘅裸照，仲畀囡囡睇，當做反面教材叫佢小心啲，唔好影埋啲咁嘅相。