後園私泉蜜泡　越浸越滑

密謀一個浪漫遊，玩足兩日，預算千零蚊，最緊要係酒店有主題特色，房間夠大夠舒服，kingsize床任碌，方便隨時發動枕頭戰，還有特別的設施增加情趣，我的甜蜜計劃一定得米！「快啲執嘢即刻出發！」「去邊？」「去『泰國』浸溫泉！」

記者、攝影：尹中午
Model：KKYu@UniqueModels
鳴謝：康泰旅行社、清遠青旅、清新溫礦泉、保捷旅運

甜蜜坦蕩蕩

置身在泰式度假別墅中，唔講又點會知，這裏是離香港四個鐘車程的清遠！消費便宜一半，卻有泰國都浸唔到的溫礦泉！我住的泉谷泰式豪華別墅啱晒兩口子住，後園更有一個私家溫泉，大得夠二人游水！剝晒衫褲打開門口，就可以跳入池中，曬住太陽浸又得，睇住星星浸又得！我始終覺得，溫泉是要坦蕩蕩地浸才像樣！反正在私家別墅中，私密度高，何不一起大解放？將酒店預備好的玫瑰花瓣撒在池上，再來個浪漫鴛鴦浴，誰知道……她已攤在床上倒頭大睡，想不到，我的浪漫泡湯大計，最終真的泡湯收場……還未說，浸溫泉之餘，我們其實也可以在池邊的泰式凉亭上按摩、做Spa……

■2人獨佔一間別墅，做乜都不怕嘈。

浸得又飲得

算了吧，反正酒店外的「河中溫泉」區，有68個不同溫度、大小的溫泉池，我一個人也可以浸個夠！這個度假區屬廣東十大溫泉之一，佔地差不多有五萬平方米，稱為河中溫泉，是因為泉眼藏於河中，每日有一萬多立方米的溫泉水自動湧出。泉水清純沒有硫磺味，屬於含鍶、偏硅酸的硫酸鈣泉，具治療作用，飲落肚都得。園內的東方園林設計，氣氛與泰式別墅截然不同，68個溫泉池水溫由10℃至60℃不等，浸到全身發燙，再轉浸10℃的冷池，嘩！凍到企唔穩，皮膚好像會結冰；再玩埋滑梯、按摩池和瀑布……皮膚真的滑咗好多！

■68個池任浸，就連河中都有個溫泉池。

■溫馨提示：綁實泳衣條帶先好去玩瀑布呀！

■泡完溫泉可以到微冷的清凉泉過冷河。

■以為去了蘇梅島的resort，誰會想到這是清遠？

清新溫礦泉旅遊度假區

地址：清遠市清新縣三坑鎮
門票：成人約$125、兒童約$62

走地雞少肥膏

礦泉水唔止令皮膚好，連清遠雞也受惠。要嚐清遠雞，最好是白切，在香港人食雞要全熟的今日，清遠仍然保持八成熟的傳統煮法，略見血色，但雞肉嫩滑，入口有彈性，越食越有雞味，最好是走地雞脂肪少，連雞皮食都唔覺肥膩！「我們的雞有120日大，周地放養，所以肉質好，這隻雞越老越好食o架！」師傅如是說。只得一味又怎會夠？用筷子做公投，豉油雞就榮登票王，還有青椒炒雞雜，新鮮無臊味，加上惹味葱油雞，又可以連吞幾碗白飯！

■運動多脂肪少的清遠雞，食多幾件也不怕肥。（b）

蟹膏撈飯

清遠的特產何止雞？還有大量豐富河鮮！像用泉水浸熟的鯇魚和掌心般大的河蟹，打開蟹蓋，入面盡是金黃色蟹膏，甘香豐腴，用來撈飯，惹味得很！小河蝦可連殼入口，味鮮又酥脆，令人食到唔停口！食完一餐又一餐，都是在溫泉區內食的清遠烏棕鵝最令我回味，牠是一種腳幼身肥，食穀和草的鵝，鵝味特濃，師傅以特製香醬煮，還將鵝肉碌扁，令肉質更鬆，與芋頭一齊食，一濃一淡配合得很！手掌咁大隻的鵝蛋，簡單地與葱花同煎，味道比雞蛋淡，但卻很鬆軟。