新一年新氣象，股市有望日日向上，祝大家今日賺個盤滿缽滿，最緊要係身體健康。回顧09年最後半日市，資金都唔放過要偷步入市，成交足足比平安夜半日市多9%，而且當日窩輪同牛熊證成交佔大市唔夠15%，反映資金的確係入緊貨，期待今日紅盤高開，有個好開始。
中央提早送大禮，突然喺假期宣佈轉讓限售股要畀20%所得稅，鼓勵舊股東長期持有，解決長久以來嘅「大小非失禁」問題，應該有唔錯嘅效果，特別係對來自IPO上市後原股東減持嗰部份。今年全年將有價值57480億元人民幣股份解禁，佔A股總市值逾25%。1月份係高潮，額度有超過6700億元，比去年12月足足多80%，當中解禁股數比流通A股仲要多嘅包括中國人壽（2628）A股，難怪H股都想彈唔彈咁樣。有見及此，中央喺年尾突然派糖，都係希望紓緩一下1月解禁高峯期，等大家過個肥年。
中移起跑爆發力可觀
新藍燈籠中國移動（941）都起跑，不禁令人提高警覺，因為佢一係唔開車，一開就升到儍。上次中移動玩飄移係去年7月中，反覆升至8月中嘅90蚊樓上，升幅近三成；大市就由17185升到20730，升幅都有兩成。淡友唔怕一萬，最怕941累積已久嘅動力釋放起嚟唔係人咁品。仲要留意去年7月中嗰浸升浪，連滙豐控股（005）都升咗20蚊，大笨象連日蠢蠢欲動，配合埋和記黃埔（013），未來數周將會好戲連場，一挾不可收拾。
上周同大家提過光大控股（165），唔覺意開口中抽升超過10%，炒緊都係股指期貨正式落實，最新版本係傳1月到位。值得留意除夕半日市，佢嘅成交竟然係之前一日1倍有多，跌穿18蚊後即見「筲箕黨」大手吸，睇怕20蚊都冇走雞。其他券商好似第一上海（227）同申銀萬國（218）就見光死，要炒股指期貨概念，唔使講都知揀選邊隻。
假期時街頭人頭湧湧，170蚊睇套3D藍精靈怪物都要排到兩三星期後，反映後生仔消費情緒高漲，仲有滿街都係自由人遊客，唔怪得I.T（999）奇峯突出，破頂霸氣十足，破頂睇1.7元。
胡孟青