新年新開始，去年基建股表現可謂令不少散戶失望，尤其中交建（1800），當年上市冇耐適逢股海剛進入牛市大時代，股價表現不俗，風頭一時無兩，股友應留有深刻印象。不過，07年11月見頂後，股價一直向下滑，去年以為金融海嘯已過，股價應有睇頭，點知一樣大幅跑輸大市。
中鐵建（1186）亦係去年另一隻叫人失望的股份，若散戶在去年初買貨，即使叻到能夠在低位約9元水平撈到貨，但如果見去年個市升得咁勁而心雄，於高位13元水平冇沽貨，持足一年，現價只係9.95元，跑輸大市幾條街。至於在10元或以上水平買入者，家陣仲要「坐艇」，心情如何更加無謂講。
基建股生意銀碼雖然好大，但一般毛利率都很低，好似09年首三季，中鐵建純利36.75億元人民幣，增長54%，營業額則達2248億元，純利率只係得1.63%，每100元先賺得個幾，散戶咁鍾情基建股，在炒復蘇概念上選股可能表錯情，其實呢類股份只宜炒上落，惟中鐵建高位蟹貨多，料在11元會有唔細阻力。
方星俠