元旦遊行中聯辦外，爆出陳巧文話長毛抽水、毓民喝令陳巧文唔好玩嘢嘅互相「挑逗」風波。陳巧文噚日搵八方澄清，話當日佢同廿幾個青年人只係講過「反對社民連抽水」。毓民就解釋，叫陳巧文「唔好玩嘢」係因為社民連負責遊行守尾門，當時見有危險先提醒佢哋。
坐低只係保護自己
陳巧文話，冇怪過長毛提佢哋危險，佢不滿嘅係其他社民連大佬嘅所為。佢話，帶頭推鐵馬辦嘅差不多全部係自發市民，但佢哋不斷被警察推撞拉打，惟有坐低，毓民呢個時候嗌咪「陳巧文，你唔好玩嘢啦！」令佢不滿，因為佢哋坐低只係保護自己、堅持抗爭。
到四五行動抬棺材去中聯辦，大家讓咗條路出嚟，但社民連仍然安排30個糾察攔住佢哋。陳巧文話在場幾個朋友覺得社民連抽水抽得太明顯，而且佢哋早已讓路，仲「作狀」攔住佢哋，搞到佢哋好似好癲咁。
毓民就話陳巧文「少不更事」，想出風頭隨便佢，但社民連當日守尾門，佢喺高位見到陳巧文坐低嘅位置好易出事，到時大家實入埋社民連數，先提醒佢。至於抽水之說，毓民更加嗤之以鼻，話佢哋當時有千幾人在場，使乜抽陳巧文水。