○九年耶誕前後，發生幾宗大新聞，令人目不暇給，首先有十二月二十四日子夜彌撒，教宗本篤十六世在聖伯多祿教堂被一位女士拉倒；第二宗係在聖誕日發生達美航空之不成功恐怖襲擊事件；第三係中國付贖金四百萬美元畀索馬里海盜（中國唔承認）；第四係武廣高鐵首發，由武漢至廣州只需三小時，速度快過日本新幹線；第五係中移動第二把手張春江被調查，帶出中國官場商場之違規違紀事件；第六當然係震撼中國知識分子嘅劉曉波被判刑十一年，罪名莫須有，係中國傳統之文字獄。
咁多事喺一年將盡，和平歡樂時間發生，教世人驚醒，當今世界危機四伏，有公開打游擊之海盜，有擇地襲擊嘅恐怖分子，有精神唔多正常嘅男士女士可能隨時發難；對中國來講，武漢高鐵代表中國科技實力、基建能力之飛躍進步，追上日本水平，值得恭喜，但張春江下馬與劉曉波入獄，就清楚顯示中國風光背後，有其黑暗面。
對一般平民百姓嚟講，原來即刻有影響，打到埋身嘅事件就係航機恐怖襲擊，好彩疑犯笨手笨腳，只係受過短期訓練嘅初哥，在機上引爆不成啫。但美國一啲反應蠢得交關，航機上不准乘客在降落前一小時去廁所，大腿上不准擺嘢，有報導話德航嘅美國航班直情在下降前拿走所有乘客用嚟取暖嘅毛氈，呢啲係絕對擾民，而且全無反恐作用嘅措施，真諗唔出美國本土安全局點解咁鬼死笨蛋。如果機上有恐怖分子要引爆化學爆炸品，佢使唔使一定喺落機前一小時開始行動呀！在大西洋上空引爆唔得呀？遲啲會唔會航機全程不准乘客在機上有任何移動，唔准去廁所，全程不供應毛氈？保安應在上機前做好，畀恐怖分子上到機，只可以憑機上乘客之隨機應變先至可以救到自己。美國保安系統性失敗（奧巴馬講嘅），就搵乘客嚟攪，乘客畀錢坐飛機似坐十個八個小時監。在飛機上實施任何干擾乘客移動嘅航空公司，都係笨蛋航空公司，唔好幫襯佢！不過到加拿大美國嘅航班，必須聽命美國，真係煩死人。諗諗吓，航空股絕對買唔過，避之則吉。