話2009年係巴塞隆拿天下，肯定冇人反對；點知一踏入2010年，巴塞新年首場比賽就俾維拉利爾逼和1:1。話說巴塞賽前攞晒舊年贏得嗰6個獎盃出球場擺陣，做場大龍鳳，相當架勢；殊不知賽後打唔沉「黃色潛艇」，反而自己今季主場聯賽長勝走勢斷纜，呢啲咪叫掃興囉！
賽前晒6盃賽後失2分
雖然巴塞受到傷兵、非國盃戰線影響而陣容不整，新球王美斯又獲得休息只作壁上觀，搞到正選要出埋約拿芬杜斯山度士（杜斯山度士細佬），但都冇影響捧場客信心，主客和個熱W企硬1.3倍。
開波前，魯營球場好似開party咁，喺場內築起個台放晒6個獎盃，仲有對方球員排排企畀掌聲歡迎佢哋進場。開波啦，已經完成一季喺6個賽事入波創舉嘅柏度洛迪古斯，7分鐘就趁亨利射中楣後近門執死雞；當大家以為一場大屠殺即將展開，走地W跌至1.05倍，原來估錯晒……。
往後戰局發展係維拉利爾越踢越順，下半場6分鐘就由富斯達接應右路傳中近射扳平；巴塞先後換入恩尼斯達同保贊，但都入唔到第2球，力爭主場聯賽8連勝失敗，當然掃興。最掃興仲係射手伊巴謙莫域末段老羞成怒踢傷敵將高甸，攞咗張黃牌，累積5黃之後下場聯賽對特內里費停賽冇份踢。
伊巴躁底下場要停賽
講真，伊巴呢腳個勢認真狠，球證嚴啲直接趕佢出場都唔過份，難怪連教練哥迪奧拿都警告伊巴：「佢應該要收吓火，再咁落去我哋將來總會以寡敵眾。」今季巴塞唯一冇波入嘅聯賽（和華倫西亞0:0），正正係伊巴缺陣，哥帥緊張係啱嘅。
巴塞自己掃自己興，而同日比賽嘅馬德里體育會同華倫西亞，就分別完場前入波贏西維爾同愛斯賓奴；當日3支主場球隊剩係得巴塞贏唔到，真係唔知攞景定贈興。
