早前接受咗截肢手術嘅羅君左，日前接受港台《舊日的足跡》訪問，佢話近來得到唔少朋友嘅關懷，雖然佢唔見咗一隻腳，但就得到好多愛，所以之後嘅日子佢會做更多公益活動去幫助有需要嘅人。羅君左喺節目入邊仲提到好友梅艷芳嘅感情事，原來佢曾經為咗阿梅一個男朋友搞到兩人嗌交，佢話：「我知佢當時嘅男友一腳踏兩船，呢個男仔另一個女朋友就係我好友翁美玲，我當時又唔可以講出真相。嗰時阿梅覺得我唔滿意佢男朋友，直至翁美玲死，佢睇到係邊個抱翁美玲去醫院，阿梅知道真相喊咗三日，之後仲話怪錯咗我。」
保子宮唔要命
據知阿梅當時嘅男朋友就係鄒世龍。另外羅君左又話阿梅一直以來都好羨慕家姐梅愛芳有一個完整嘅家庭，佢仲話：「阿梅就係想做一個真正嘅女人而唔想犧牲（切除子宮），終於就離開咗呢個世界，我哋班朋友一直都叫佢領養，但佢份人真係好硬頸。」