上個月煲《FFXIII》，踏入新一年，無論你爆咗機未，點都要換吓口味！同廠出品，由SquareEnix推出嘅PSP遊戲《KingdomHeartsBirthBySleep》今個星期推出，畫面同樣追求唯美，遊戲更加入迪士尼卡通人物，例如米奇就化身成為國王，仲會陪大家過關冒險。
記者：許福合
網民：掟白雪公主落山
《KingdomHearts》在PS平台上都出過好幾集，而今集特別以前傳方式描寫世界觀，有玩過前作兼且熟悉故事發展嘅玩家，不難從中知道更多劇情嘅前因後果。而今集三名主角菲恩圖斯、亞克雅及泰拉，就係三位持有鑰匙嘅勇者，為咗尋找失蹤鑰劍大師傑亞諾特而戰鬥。途中會見到眾多迪士尼卡通角色，當中包括白雪公主、小飛俠、史迪仔等。
但別以為每個玩家都期待玩迪士尼人物，有網民就表示極之反感，佢話，如果有得揀，佢最想將白雪公主掟落山，因為佢好樣衰喎！
出招將敵人縮小
新一集玩落發覺系統同PS2版有啲相似，招式可以自由組合，有上百種魔法或技能可使出，不過就咁玩會略顯死板，所以攻擊中途，玩家更可以加入特殊招式，令視覺效果更華麗，若果出連續技，殺敵效果亦大為提高。不過想要玩得順暢，更要留意執行指令Bar，儲滿就能轉Style，當中亦有唔同級數嘅攻擊力指令，例如一招將敵人縮小，雖然破壞力唔高，不過就好實用，又或當遇到大量敵人，發放大火球就能有效殺敵。
另推特別版PSP
按下三角掣，可使用技能同魔法，即係遊戲嘅Deck指令，你可以預先編定，當戰鬥時發出這個指令，角色就會進入所謂嘅Charge狀態，做出設定好嘅攻擊動作。其實，角色擁有嘅指令可不斷增加，只要到相關商店，就可以買到唔同嘅Command，當然，付出大量金錢就係必然了。《BirthBySleep》除咗單人模式，另外還提供AdHoc模式連線合作，可以最多3人一齊戰鬥。
《BirthBySleep》亦出特別版主機，用魔幻銀為主色，機背印有米奇、王冠、鑰劍、心形等圖案，拎出街玩就唔怕撞款。
Profile
主機：PSP
遊戲類型：角色扮演
遊戲人數：3人
製作廠商：SquareEnix
推出日期：2010年1月9日
