《城市論壇》噚日討論溫總口中嘅「深層次矛盾」究竟係乜，討論未有結論前，現場人士嘅矛盾已經滿瀉。先有開口埋口反對五區公投嘅全國政協委員劉夢熊，被白鴿黨主席仁哥當場踢爆佢經常私下講一套，公開講另一套，傾偈時質疑中共點解要拉劉曉波，公開發言時就選擇聲都唔聲。
有熱血青年就狂插民建聯，指民記葉國謙同民記好多立法會議員經常支持漠視民生嘅政策，臨尾仲要向葉國謙大嗌幾句「民建聯最無恥」至走，搞到葉國謙鬼咁尷尬。
一向斯文嘅論壇主持謝志峰亦走唔甩，臨離場時見有維園阿伯喺欄杆掛咗條寫住「防止六四事件重演，及時處理劉曉波案，安定繁榮大局為重」嘅橫額，都忍唔住罕有地扯火同班阿伯嘈咗幾句。