夠Car事：愛波子似龜仔

唔少收藏家對珍藏嘅迷戀，好多時都源於童年情意結，在汽車界打滾多年嘅張國清亦不例外，由兒時恨同波子影一張合照，到現在收藏多架古董保時捷，所愛嘅就係波子多年不變嘅烏龜外形、夠晒氣勢嘅鯨魚尾翼、身份象徵嘅風冷引擎。「太嘈？呢啲引擎聲搵唔番喇！成日要整？咁先有樂趣！」執着與堅持，永遠只係一線之差。

記者：許維雅
攝影：伍慶泉

烏龜外形多年不變

香港大把波子迷，但好似收藏家張國清咁迷足幾十年、對古董PORSCHE特別鍾情嘅一啲都唔多，囝囝囡囡一出世已被佢耳濡目染，搞到現在全家一人一架。儘管囡囡考到車牌嘅第一份聖誕禮物想係名牌手袋，爸爸最後都係送上一部紫紅色嘅92年PORSCHE968。愛得如此深，原因都不離「情意結」這三個字，「早幾十年前，喺街好難見到PORSCHE，細個遇到直頭好似見到孔雀開屏咁開心，興奮到即刻仆返屋企撲相機影相，可惜返轉頭就走咗。最初係俾佢有趣嘅外形吸引住，點解呢隻烏龜仔咁特別嘅？開始慢慢了解佢嘅性能同搜集資料，先發現佢咁有名氣，引擎同馬力咁勁。」種下情根，所以多年來離不開關於車嘅生意，由收藏古董Mini買買賣賣開始，到現在負擔得起玩古董波子，清哥認為兩者其實十分類似，「Mini由1958年生產到現在，外形上都無大變過，十分長青襟興，PORSCHE亦係一樣。」

■呢架屬經典車系911嘅始祖。

■慶祝愛女18歲考到車牌嘅禮物，紫紅色車身襯紫紅色內櫳。

■極罕見，兩盞青蛙燈更係燈廠專為改裝波子而設計。

越麻煩我越開心

影相訪問要麻煩佢將珍藏移來移去，佢大叫：「我哋鍾意車嘅，越麻煩越開心！」睇得出！因為清哥全程跳跳紮開蓋按掣詳細解講佢近排嘅最愛911Turbo，「PORSCHE廠喺86年生產咗一部限量版FlatNoseTurbo930，全城熱搶，於是廠方就因應需求將部911Turbo改裝成FlatNose復刻版一樣，呢部就係其中之一，我都係啱啱由英國一位朋友手中搶購返嚟。」寶藍色車身、原裝第一代PORSCHE胎軨、四四方方隱藏式頭燈……真係處處吸引，「佢個尾先係設計師嘅心血所在，因為佢會假設一架跑車永遠會喺其他車前面，呢個鯨魚尾翼，以前係人見到都驚。第二樣古董波子嘅象徵就係風冷引擎，佢由66年生產第一代，直至98年就停產。雖然風冷引擎較嘈，但舊一輩思想都喜歡風冷引擎，咁先代表到PORSCHE嘅氣質，揸出街先夠味道。」古董車維修保養特別麻煩，波子一樣有佢嘅死穴，「水平對向引擎容易漏油係最大致命傷，揀車時一定要睇引擎夠唔夠乾爽，無濕的話已有八成合格。」

■波子外形風格多年不變，睇見呢個大尾翼車尾便知。

■原裝全黑內櫳仍然保養良好，懷舊味道十足。

■後置引擎令重量聚於車尾，引起容易仰頭現象，唔係人人識揸。

■風冷引擎靠撞生風降溫，車側風格扮演重要角色。

■打開頭蓋，就係波子獨特設計嘅行李箱及油缸。