「80後」呢個名詞喺內地出現咗幾年，近排突然熱爆香港特區，連財爺鬍鬚曾都唔執輸，喺網誌分享對80後嘅意見。「50後」嘅佢話好明「80後」以激烈手法表達對民生議題嘅關注，強調激情唔一定係負面，但就要有理性同客觀討論。
唔少人認為，年輕人越來越激係因為社會結構同經濟轉型令佢哋嘅機會越來越少，但財爺就唔認同，話第四代香港人享有嘅機會絕對唔少，仲話佢上星期特別喺官邸宴請「80後」嘅新晉政務主任，聽吓佢哋有乜意見，唔知稍後會唔會約埋建制外嘅「80後」吹吓水。
鬍鬚曾本來噚日晏晝聯同金管局總裁攞命陳同陳家強局長一齊上京，點知北京大雪影響航班，佢哋喺機場呆等四個鐘先知道航班取消，改喺今朝再出發。