前晚「鄭四萬」鄭秀文（Sammi）和「四奶奶」鄧萃雯在紅館碰頭，雯女擔任Sammi個唱嘉賓，兩位沙漠中女識英雄重英雄互相打氣，更互相嘲弄中女冇拖拍的尷尬處境，雯女笑指Sammi乾旱到似沙漠，但幸有自己相陪，Sammi則說：「你咪仲乾過我，啲報紙話你幾廿年冇拍拖！」
鄭秀文綽號叫阿四，曾被喚作鄭臭四，現在新花名是鄭四萬，她前晚演唱會就特別請來四奶奶鄧萃雯任表演嘉賓。兩個自稱乾旱沙漠等愛的女人，合唱《問我》，之後Sammi對雯女說：「點呀阿四？其實我同你好有淵緣，你叫四奶奶嘛，你知唔知我花名叫阿四，好驚，四加四等如幾多呀？」雯女笑說：「八呀，聽講你乾旱到好似沙漠咁，怕乜呀，有我陪你。」Sammi又謂：「你咪仲乾過我，啲報紙話你幾廿年冇拍拖。」
為雯女睇TVB
Sammi謂要與雯女一起證明單身女人也能很美麗，雯女補充：「好期待驚天動地嘅愛情，我一路都等緊，讓我先啦。」Sammi笑謂常看雯女主演的《巾幗梟雄》，又說：「我平時只睇discoverychannel，為咗你，我成個月都睇TVB。我咁講TVB會唔會播我啲歌？查實佢唔播我都賣5萬幾張，唔好播囉！」後來Sammi返後台換衫，雯女獨唱《明星》，表現不俗。
「最鍾意打細路」
Sammi前晚在送錶環節請了一位小朋友上台，小朋友表示要唱《罪與罰》，Sammi開心謂：「新歌都識？我嘅受歡迎程度直逼2001年出世嘅小朋友。」她又對小朋友說：「係咪真係識唱o架？唔識打死你！我最鍾意打細路，見我單身就知我有問題啦。」結果小朋友唱了幾句，讓Sammi開心不已。
另外，梁漢文（Edmond）、蘇永康除夕當晚和小肥及側田等到澳門做騷，當晚有唱片公司人員帶同兩歲的小妹妹到場，小妹妹在後台很受歡迎，跟Edmond就最為投契，當Edmond抱起她時，更露出一副慈父相。
撰文：丁寧
