《十月圍城》講清廷派刺客到香港行刺孫中山，套戲十分賣座，買票唔容易。孫中山在中國近代史家、國民黨黨史描繪之下，係一個堂堂正正嘅君子，有妻（元配盧慕貞）、有妾（陳粹芬），有另一位太太宋慶齡（呢位最多人識），幾合乎清末民初中國男人有妻有妾嘅規矩。
後來嘅蔣介石、毛澤東都係一樣。但老友記靚女潘睇戲之餘，翻查歷史，以女生之尖銳眼光，搵到孫中山「人不風流枉革命」嘅一面，仲係特別鍾意「兄妹戀」㖭，第一位係在橫濱與十五歲日本女子大月薰結婚（一九○三年，一九○六年生咗個女名宮川富美子），另外鍾情大月薰之前，另有一位十五歲情人淺田春，即使宋慶齡也比孫中山年輕二十六年。
呢啲事在二十世紀初而言，視作等閒，報紙或未得聞，即使知道，報者亦會以「為長者諱」嘅態度，冚住冚住；孫中山愛革命，也愛年青女子，蔣介石日記就有講到自己在香港召妓㖭。到了二十一世紀初之二○○六至二○○九年，任何一位中國政治人物若在香港或台灣發生呢種事，必然下台無疑。陳可辛大導演唔知有冇興趣拍一套孫中山情史呢？老虎仔活士睇吓美國偶像甘迺迪之遊艇裸女跳水照片，就會嘆一句佢生不逢時咯。
一位讀者關先生睇完本欄十二月三十日「十月圍城有啟示」之後，來電郵指：「（一）新加坡係家長式專制，經濟發展好好，（二）菲律賓有民主，經濟好唔掂，（三）民主並非經濟發展的先決條件，（四）菲律賓貪污與中國式貪污十分嚴重，新加坡就冇貪污，貪污先至係經濟發展隱憂。」多謝電郵。
每逢講到民主與經濟，就會有人舉新加坡、菲律賓、印度做例子，指民主與經濟無必然關係。近年因為印度經濟增長好快，僅次於中國，冇人再提印度，就多啲人以菲律賓為「民主害經濟」嘅示範。外國學者現在亦討論中國式威權專政推動經濟發展模式，是否可以長期抗衡西方之民主法律制度，但並不睇最近三十年就下結論，而係要睇二三百年，畢竟西方嗰套五百年來戰勝東方，過去二百年更主導世界啫。將來中國是否真的可以反先，再領風騷五百年，左丁山睇唔到矣。