資本策略（497）有靚爆鏡中期業績墊底，仲有大孖沙基金坐鎮，買資策，博資產大升值。資策剛公佈2010年度（3月年結）中期業績，純利升咗2.9倍到3.97億銀。就當全年度都係呢個數額入賬，資策PE都係得4倍多少少。
又資策最新NAV0.4元，現價折讓42%，已經有唔錯折讓墊底。仲要咁睇，在資策投資組合當中，持作出售物業總值高達45億銀，真係係咁易加多20%上去，資策已經可以額外增值9億銀，每股增值0.11元，幾乎係現價一半。
再講，資策股東當中，包括無寶不落嘅ValuePartners。12月頭，有報道話著名基金鄧普頓講過，唔排除喺合理價位增持資策。一於跟基金上車，齋計資策反映上邊每股NAV增值，股價就要翻近半番到0.34元。
慶鈴折讓4成抵買
慶鈴（1122）最新手頭現金58億港銀，每股淨現金講緊2.34元，高過現價1.9元。又慶鈴NAV3.15元，現價折讓近40%，亦係折讓最大嘅中資汽車股之一。要咁睇，阿爺振興汽車工業嘅措施，今年應該會繼續，直至經濟陰霾全消。大圍環境好，慶鈴本年度業績，可以更上層樓，折讓唔應該咁大。呢轉短打，先望每股淨現金值2.34元，慶鈴要升23%。
錢雋