最近唔少「90後」都走出嚟遊行，講普選、講政改、講曾蔭權不代表我，但係學友社搞嘅全港中學生十大新聞選舉，選出學生眼中最切身、最關注、最有影響力嘅新聞，結果任何關於煲呔嘅消息，竟然三十大不入，中學生咁識時務做河蟹，阿爺應該好放心。
對六四認識好少
地利亞修女紀念學校（吉利徑）中四生鄧建江話，自己最初有份揀三十大新聞，都有揀到煲呔慳電膽券事件，最後入唔到圍覺得可惜，「市民唔應該批判佢，佢為人民服務，我哋應該要體諒。」
09年係六四事件20周年，但呢單新聞都只係排第18位，反而十．一大閱兵就排第七位，學友社認為反映學生「傾向關心有顯著嘅新聞」。保祿六世書院曾翠玉同八方講，中史堂有關六四事件嘅篇幅唔多，老師又唔教得多，所以中學生對六四認識好少。十大新聞三甲位置分別係奧巴馬當選美國總統、米高積遜死亡同高錕獲諾貝爾獎，大路兼正路。