恭喜發財，恭喜發財，雖然未到農曆年，不過八方都忍唔住講幾聲恭喜發財，祝泛民今年發大財，事關甫踏入2010年，泛民政黨、團體就發咗一筆新年財。元旦日大遊行人頭超出預期賺咗，遊行集會期間籌款數字亦頗為可觀，泛民黨派團體共籌到約30萬元，即係平均每名遊行人士捐款10元。
主辦遊行嘅民主動力召集人蔡耀昌同八方講，遊行當日籌到大約70,000蚊，聽落成績都唔錯，不過蔡耀昌話要蝕本，事關舉辦遊行開支唔少，包括場地佈置、音響、廣告宣傳等，成本大約要10萬元，因此尚差三萬蚊先收支平衡。
搞總辭宣傳費龐大
民陣搞7.1遊行，與泛民黨派君子協議上繳一成籌款金額作行政經費，民主動力冇類似安排，蔡耀昌笑言希望其他黨派有錢出錢，有力出力，分擔吓開支就好嘞。公民黨有多個大狀坐鎮，籌到70,000蚊左右，冇乜驚喜。
至於籌款之星，不出所料由社民連蟬聯，該黨擺咗三個街站，總共籌到近150,000元，佔整體籌款數字五成，十分犀利，反映遊行人士當中，社民連fans眾多，「紅衫軍」人力財力都唔係嘢少，外界真係唔好再形容佢哋係「丐幫」嘞，禾稈冚珍珠，轉口叫富貴黨貼切啲喎。
社民連副主席陶君行卻話唔好以為十幾萬元好大數目，事關今年要搞總辭公投，宣傳費用肯定唔係小數目，呢十幾萬只係杯水車薪，有排未夠數，未來幾個月仍要努力籌款，否則公投凍過水。
煲呔民望或「雙底」
遊行籌款數字多寡，可以視為另類民意指標，金額數目通常與政府民望成反比；去年7.1遊行人數達7.6萬人，創04年以來新高，泛民黨派籌款數字亦水漲船高，三大黨共籌到70萬元；同一時期，煲呔民望、支持度、施政滿意度俱跌，民望後來更一度跌穿50分被評為「不受歡迎」領導人，如果唔收番個翻叮政改方案，八方相信今年煲呔民望出現「雙底」情況機會甚大。
mailto:[email protected]