邊個話鬼片一定要嘔心又核突？繼《變2》之後，令人噴血嘅性感女星美瑾霍絲，再添食《陰點鬼情人》（Jennifer'sBody），扮惡鬼行性感！日前影碟終於賣街，全高清靚畫固然無走樣，更正係另附戲院都睇唔到嘅5分鐘加長版，想知佢點樣血色誘惑眾男生，咁就要買隻睇喇！
記者：陳國輝
百變珍妮花由頭索到尾
今次只係推出Blu-ray版，並無發售DVD以及VCD，究竟係咪發行想觀眾一睹美瑾霍絲嘅高清美貌，咁就不得而知；但肯定嘅係，與同期周秀娜藍光寫真相比，後者似乎以影音專家Ricky所講嗰一句最精警，佢話：「呢隻碟係最靚嘅VCD！」去評價周秀娜Blu-ray，佢話真係唔識講，相對地《陰點鬼情人》就正常好多，特別係珍妮花於戲內會穿上不同類型嘅服飾，例如DeepV低胸裝、Cutie啦啦隊裝，甚至清純學生Look。如果嫌《變2》戲內唔夠性感，呢套擔大旗之作可能滿足到你。
出浴刪剪片段
一打開主介面，已經有「戲院版」同埋「加長版」畀你選擇，至於額外5分鐘內容究竟係講啲乜？咁就要留番自己買碟睇喇！此外，Bonus內容亦尚算豐富，例如有美瑾霍絲嘅個人特輯、導演專訪，仲有6條已刪剪片段。當中有一條片超爆，劇情係講索女們剛出浴嘅一段對話，畫面仲係赤裸裸露上身嗰隻！6條刪剪片段，再加埋加長版147分鐘，齋睇內容全片超過兩小時；劇情啱唔啱睇見仁見智，若只係想一睹索女美瑾霍絲，呢隻藍光影碟算係交足貨。
故事：離奇火災不死
美國小鎮內，索爆校花珍妮花（美瑾霍絲飾）喺一場火災之後性情大變，更慘被邪靈附體，為求保持美貌與身材，用美色誘惑一眾同校男生，佔據佢哋嘅身體，甚至吃掉對方腦幹，滿足自己！全校男生無不想一親芳澤，有人甚至瘋狂地犧牲自己性命以換取一夕歡愉；珍妮花嘅好姊妹妮迪見事態嚴重，決挺身搵出邪惡根源，替天行道！
格式：Blu-ray
畫面：1080p
聲效：DTSMA5.1
字幕：中、英
特別收錄︰導演及編劇幕後講評、刪剪片段、蝦碌片段、美瑾霍絲索到爆特輯、編劇貼身專訪等
