前日大遊行,一般人以為「80後」衝擊中聯辦好出位,其實最搶鏡嘅,並唔係一班散兵游勇,而係西區分區指揮官陳進,佢指有遊行人士刻意「挑逗」警方釀成衝突,即刻出晒位。
被網民嘲笑
遊行結束後,陳Sir同記者講,雖然遊行整體上十分和平,但喺遊行尾段,卻有部份參與者「刻意去挑逗同埋衝擊我哋警方,同埋破壞我哋同主辦者協議嘅安排。」陳Sir針對試圖越過警方防線衝擊中聯辦嘅遊行人士,可惜詞不達意,將挑釁講成挑逗,真係差之毫釐,謬之千里。
好多人對陳Sir如此描述警民關係不以為然,喺網上笑言可能鍾情制服誘惑嘅人,先有興趣挑逗警方;亦有網民話陳Sir反主為客,事關警方成日阻撓遊行人士,又將示威區設置距離中聯辦甚遠,擺明係要引起遊行人士不滿,「陳指揮官,我沒有挑逗你,你卻來挑逗我們!」
陳進幾年前做過北角區副指揮官,今年針對中聯辦遊行示威陸續有來,相信陳Sir仲要面對好多挑逗。