由奇連伊士活、香港Mark哥到魔鬼獵人但丁，揸槍耍帥邊走邊射可以話係男人嘅浪漫。由曾經開發《StarOcean》、《ValkyrieProfile》嘅Tri-Ace開發、1月推出嘅RPG《EndofEternity》已經有試玩版免費下載，兩男一女揸槍飛身開兩槍，落地彈起補多兩槍，打個觔斗又幾槍，仲可以三個主角同時攻擊，畫面無《FF13》咁靚，但爽快程度更甚。
文：阿洛
靚女拍檔最叻玩槍
睇主角們嘅裝扮同槍械，我以為係現代，實則係以遙遠未來因污染以及地軸變動而死唔斷氣嘅地球為背景，而玩家嘅對手，就係機械感好重嘅怪物。遊戲中玩家將會扮演17歲o靚仔Zephyr，而拍檔就係PrivateMilitaryFirms嘅Vashyron同Reanbell。留意，金髮靚女Reanbell嘴嘟嘟又斯斯文文，係我等宅男至愛，而且仲係玩搶高手，飛嚟飛去時裙底春光無限，我無心睇，但侷睇，應該都算係賣點。
回合制夠親切
今次嘅試玩版以迷宮戰鬥為主，有「普通模式」同邊玩邊學嘅「新手模式」，流程同玩法都唔馬虎，幾抵玩。而遊戲採用半即時制嘅Tri-Attack-Battle系統，偏向傳統RPG類型，有番啲親切感。而每個角色都有各自的時間計，每個角色每回合都有1次攻擊機會，決定目標㩒掣就會儲力，見到準星即係已經瞄準敵人，可以發動攻擊，而且亦可以儲多幾個圈嚟連射，留意越近敵人就越快儲完，所以走位都好重要。
交叉走位左右包抄
而除控制攻擊，仲可以控制角色攻擊時走位。當InvincibleStateGauge儲滿後就可以發動特殊攻擊，可以設定攻擊時嘅移動路線，發動之後角色就會依照路線邊走邊射，華麗又帥氣。而當特殊攻擊嘅路線同其他兩名同伴重叠時，三人就有機會同時三槍齊發施展必殺技ResonanceAttack，三條友飛嚟飛去何其壯觀！
不過，如果特殊攻擊移動時遇到敵人或障礙物，動作就會中斷無得再射，射射吓唔射，好無癮。
Profile
遊戲：《EndofEternity》
機種：PS3/Xbox360
製作廠商：Tri-Ace
類型：RPG
推出日期：1月28日
人數：1