做戲都有講，如果有人望住你做嘢嗰陣時，個樣硬係心不在焉，嗰個就一定係卧底。憑住呢點，八方喺遊行隊伍中，竟然發現混入一名疑似無間道！
噚日遊行期間，八方發現有個孭住灰色背囊、電車到痹嘅肥仔，一時行近龍頭，一時留喺龍尾，又不時拎起手機影相，一般遊行人士唔會咁做，龍友器材又冇咁簡陋，八方對佢舉止起疑，望多佢兩眼啦，越睇越覺面善，終於諗起嘞！
有意無意向記者索料
話說日前班後生仔闖關北上投案聲援劉曉波，喺粉嶺港鐵站集合時，已有便衣探員在場監視，當時呢個肥仔身穿啡色皮褸到場，仲有意無意黐埋記者度索料。由於香港警察已派便衣，即係話肥仔好有可能係上面嘅人，估唔到元旦日佢又現身。八方與佢重遇十分意外，曾向佢打招呼，希望可問吓佢底細，不過佢冇反應，究竟佢係邊路人馬不得而知。