上月盟主
「夫戰，勇氣也。一鼓作氣，再而衰，三而竭……」春秋時代軍事家曹劌嘅道理，套用喺球賽上一樣掂。華素爾對上兩場比賽都因球場積雪取消，話就話養精蓄銳，但10幾日冇踢過波，無端端「歇冬」其實未必係好事。「2哥」查仔冇理由連續4場失分，呢個2.05倍客W值得去馬。
查爾頓唞夠冇疲兵
只要考過會考，都應該記得〈曹劌論戰〉呢課書，簡單啲講，一次唔打，兩次唔打，到第3次至打，戰意總會鬆懈，爭勝本錢大打折扣，華素爾喺拆禮物日作客對布里斯托流浪，同埋兩日後主場對諾域治兩場波都取消，其中對諾域治場波係開波前唔夠一個鐘，班球員本來準備就緒至話唔使踢，真係搵嚟搞，而至怕班球員歇冬後對腳「雪」到硬晒，而查爾頓過完快車期至少都唞番幾日，照計兵疲問題唔存在。
查爾頓近期強勢盡失，主要係受盡傷兵問題困擾，就以上場作客和賓福特1:1為例，除咗個別主力傷兵之外，仲有首席射手般頓同埋尼日利亞後衞蘇捷停賽，面對近期回勇嘅賓軍能夠保住不敗已經唔算差，唔怪得領隊柏堅遜賽後開心到好似執到金咁。總計隊波12月共進行3場作客，2勝1和唔失禮，而今季已入12球嘅般頓坐完波監肯定如出柙猛虎，華素爾守衞有排驚。
唔信邪要伯明翰對家
家講華素爾上場（上個月19號）和奧連特2:2，至叫做止跌，近期場場失波後防靠唔住，查仔今場應該就憑較佳狀態贏番場，而既然雙方近期都失波唔少，吼「大」膽。過關除咗要埋自己喺另一版推介嘅布里斯托城「主勝」外，唔信邪要伯明翰對家。諾定咸森林唔係善男信女，主場亦4連勝，伯明翰聯賽連勝唔斷，盃賽冇得威喇啩。
藍鑽石
近5場往績：LWLWL